8月6日係我既正日生日, 因為年年既正日我都鍾意同屋企人過, 所以大米就同小米早一日慶祝啦~
因為星期六加上小米又有d唔舒服, 我地訓到成1:00p.m.先起身, 2:00p.m.先去食lunch (深井PizzaHut), 食完之後就出發去尖沙咀海港城行街 (其實係因為大米仲未買禮物, 所以帶小米去揀姐, 無d誠意!~), 大米最後買左對可以出街既超輕拖鞋俾小米做生日禮物, 都幾潮架, 因為小米早排落大雨返工對鞋+襪濕清, 下次就可以著哩對鞋返工都唔怕啦!
買完禮物行完街就到戲肉啦, 大米一早就book左山頂既太平山餐廳同小米食燭光晚餐, 咁我地就由尖沙咀搭天星小輪去中環, 再轉15號巴士上山頂, 沿路小米好似大鄉里咁成日問哩度係咩果度係咩, 因為小米真係好小踏足d半山豪宅區^^ 上到山頂一出就見到太平山餐廳, 時間岩岩好我地即刻入左去啦, 點知原來大米唔知如果要special位就要book抬果時預早講定 (一早都叫佢practise多d架啦!), 所以我地就無window-seat啦. 果晚全場都full哂, 同埋無我想像中咁grand咁有氣氛, 不過都係第一次大米帶小米去哩d地方食飯, 希望佢下次再進步d啦~^^
我地果晚食左:
龍蝦湯 ($88): Waiter幫我地share左, 所以每人都有得試, 不過我地覺得反而咁岩岩好, 如果full size一定會太膩, 味道好好, 夠濃!
炭燒豬肋骨 ($196): 大米order既main course, 配左Gravy sauce, 薯蓉同雞油飯, 份量好大, 但大米都清哂, 一定好好味~~
炭燒三文魚扒 ($198): 小米order既main course, 配左牛油白汁, rosemary roasted potato同埋salad, 我哩個份量OK, 但係因為有d位燒多左所以有d苦...同埋個sauce好膩, 好彩我落左小小咋~
曖心朱古力蛋糕 ($78): 哩個甜品係佢地既皇牌菜, 所以製作時間要20min都等 (對於無耐性既大米黎講已經好好架啦), 結果真係好正, 好濃朱古力味但又唔太甜同膩, 記住要一口cake一口雪糕咁食先好味架~
埋單 $616, 都OK啦~ 有d貴但係加埋環境等等都reasonable既~
食完飯之後我地坐返15號巴士去灣仔同銅鑼灣行街, 大米就大有收穫啦!! 小米係G2000買左$825衫俾大米返工裝身, 雖然好肉痛, 但最緊要大米開心就得啦~^^
8月6日正日啦!! 因為琴晚太攰既關係, 大米一訓就訓都2:30p.m.啦! 之後我地去左傅記食小小野就去搵樓睇啦! 原本我地搵開果個Raymond走左, 我地唯有求其搵個agent睇下先啦, 點知哩個好唔掂, 約好左自己又走左去, 又只係得兩個麻麻地既盤俾我地睇, 無想像中咁好, 除左個廳大左 (都無想像中咁大), 廚房細左好多 (不過多左個工人房+廁所), d房都係差唔多, 係因為海景囉~~無d必買既衝動, 遲d搵中原再睇過先得~
睇完樓之後, 我地就出去荃灣join我屋企人一齊去明星海鮮酒家食生日飯啦~ 果晚食左around $1000, 不過d野幾好食同埋份量好多, 基本上佢寫6人餐其實係for 8人都得既, 剩番d炒飯我拎左黎帶左兩日lunch先食得哂~^^
29歲啦, 希望我同我既親人都開開心心, 身體健康, 老公事業順順利利, 搵多d錢俾小B同埋我駛!~^^
.jpg)
.jpg)
